जनहित मे जारी

 गुढीपाडवा आला...शांतीत गेला..

राखीपौर्णिमा आली ..शांततेत गेली..

स्वातंत्र्यदिन आला..शांततेत गेला..

एवढंच काय..गणपती आले..तेही शांततेत गेले..

आता मात्र हद्द झाली या सय्यमची..

आज खुद्द कंगना आलीये..काय बिशाद आहे या कोरोनाची..आमच्या मराठी बाण्याला शह देण्याची..आमची मराठी अस्मिता दडपण्याची..?

 

'नमस्कार कोविड-19 के अनलॉक की प्रक्रिया अब पूरे देश में शुरू हो गई है...ऐसे में अपने घरों से बाहर तभी निकलें जब बहुत आवश्यक हो'

घ्या आता या पेक्षा 'बहुत आवश्यक काम कोणते असू शकेल ? आत्ता घराबाहेर जर पडलो नाही तर कसे चालेल ? करोना काय आज आहे उद्या नाही पण 'कंगना मुंबईत येतीये' या सारखा सोनियाचा दिनू तो कुठला ? म्हणूनच आम्ही बाहेर पडलोय जरा पाय मोकळे करायला..

'सार्वजनिक स्थानों पर कम से कम दो गज या छह मीटर की दूरी रखें..'

तुम्ही शंभर सांगाल हो पण एअरपोर्ट हे सार्वजनिक ठिकाणी थोडीच आहे ?

'फेस कवर या मास्क पहनते समय ध्यान रखें कि मुंह और नाक अच्छी तरह से ढ़कें रहें'

आम्ही काय गुन्हा केलाय की आम्ही तोंड लपवू..तोंड तर ती कंगना लपवेल.तोंड झाकले तर गर्दीत गौरवोद्गार कोण काढेल मला सांगा.. आणि नाक का झाकायचे आम्ही..या महाराष्ट्रात मोकळा श्वास घ्यायला आम्हाला रोखणारे तुम्ही कोण ?

खांसी बुखार या सांस लेने संबंधी समस्या होने पर तुरंत राज्य हेल्पलाइन या राष्ट्रीय हेल्पलाइन 1075 पर संपर्क करें...भारत सरकार द्वारा जनहित में जारी।

हे असल्या खांसी, बुखार भिकार आजारांना आम्ही भीक घालत नसतोय.. आणि राहता राहिला हेल्पलाईन चा प्रश्न तर 'एक बात कान खोल कर सुनलो..इसके बारे मे तो हम WHO की भी नहीं सूनते ये 'राष्ट्रीय हेल्पलाइन' किस झाड की पत्ती है भाई..? आणि तसही हे 'जनहित मे जारी' आहे..

जनहित आणि आमचा काय संबंध तुम्हीच सांगा आता...

हृषिकेश पांडकर

०९.०९.२०२०