आमच्याकडे काय पदार्थ मिळतात,ते कसे दिसतात आणि त्याची किंमत काय आहे, हे रस्त्यावरून जाणाऱ्या प्रत्येक व्यक्तीला व्यवस्थित सांगणारे कलात्मक मेनू कार्ड जपान मध्ये फिरताना हमखास नजरेस पडणारे दृश्य.पदार्थ कसे दिसतात हे फोटोमधून न सांगता त्या पदार्थाची लाकडी अथवा रबरी प्रतिकृती बनवून दुकानाबाहेर लावणे हा मजेशीर भाग इथे बऱ्याच ठिकाणी पहायला मिळतो.
अगदी ताट वाढून ठेवावे इतके स्पष्ट आणि भुरळ पाडणारी पदार्थांची सजावट माझ्यासारख्या खाण्याची फारशी आवड नसलेल्या माणसाला देखील तितक्याच ताकदीने आकर्षित करते हेच याचे यश आहे.व्यक्ती अगदी आत जाऊन ते पदार्थ मागेल आणि खाईल अशातला भाग नाही पण कुतूहलापोटी जवळ जाऊन नक्की पाहिलं हि शाश्वती आहे.फक्त खायचेच पदार्थ नाहीत तर वाईन,बियर आणि सॉफ्ट ड्रिंक्स या सारख्या पेयांचे देखील बनावट नमुने पद्धतशीर मांडलेले आढळून येतात.
भातुकलीच्या खेळात मांडलेल्या छोट्या भांड्यांप्रमाणे रचलेली आरास मला कायम लग्नात मांडलेल्या रुखवतासारखी भासत होती.त्यात ठेवलेले रंगीबेरंगी पदार्थ आणि शेजारी तिरकस उभ्या केलेल्या नाव आणि किमतीच्या पाट्या लांबूनच आकर्षित करतात.पट्ट्यांवर लिहिलेली सगळीच अक्षरे वाचता नाही आली तरी उभ्या पद्धतीने असलेली लिखाणाची शैली कायम लक्षात राहते.
शंकू आकाराचा मसाला डोसा किव्वा दोन फुटाचा पेपर डोसा याच्या दिसण्यावरून विकत घेण्याचा कल जास्त आहे. नाहीतर ताटभर मसाला डोसा सुद्धा त्याच चवीचा असतो की.. धूर येणारे आईस्क्रीम चाखणारे त्या धुरामुळेच त्याकडे आकर्षित होतात अगदी त्याच मानसिकतेला धरून हि जपानी मंडळी असे वैशिष्ट्यपूर्ण मेनूकार्ड बनवत असावेत.
असो,प्रत्यक्ष जेवणाला कितपत चव असेल याचा अनुभव घेता आला नाही पण बाहेर असलेले हे मेनू कार्ड मात्र डोळ्यांची भूक नक्कीच भागवून गेले.
No comments:
Post a Comment