ऑनलाईन शाळा

 'ऑनलाईन शाळा' म्हणजे सरकार अन शिक्षण बोर्डाचा मोघम तोडगा झाला..

करोनामुळे वर्ष वाया जाऊ नये म्हणून चिमुरड्यांवर मात्र अन्यायच झाला...

स्क्रीन शेअर करून आकडे,चित्र आणि अक्षरे तर स्पष्ट वाचता येतील कि..

पण काळा फळा,ओला खडू आणि डस्टर मधून उडणारी पांढऱ्या खडूची पूड कशी दिसायची ?

सोनी,JBL चे हेडफोन लावून शांत आणि एकांतात सरांचा अन बाईंचा आवाज अगदी व्यवस्थित येईल हो..

पण मधल्या सुट्टीची घंटा,सुट्टीच्या बातमीचा धिंगाणा आणि राष्ट्रगीतातील 'भारत माता कि जय' कुठून ऐकू येईल ?

घरीच असल्यामुळे रोज आईच्या हातचे गरम जेवण सहज मिळू शकेलच कि..

पण घोळका करून खाल्लेल्या थंडगार पण 'व्हरायटी फूड' ची चव कशी मिळणार ??

इंटरनेट बंद पडून किव्वा लाईट जाऊन सुट्टी मिळेलही कदाचित..

पण 'शाळेभोवती तळे साचून' मिळणाऱ्या सुट्टीच मोल त्याला कधी यायचे ??

परवा बाईंनी वारीचे फोटो दाखवून पालखीची माहिती व्यवस्थित सांगितली खरी..

पण कपाळाला गंध,हातात टाळ आणि सोनेरी कागद लावलेली पालखी प्रत्येक वर्गात मिरवण्याची हौस तेवढी राहूनच गेली।.

कॅमेरा आणि माईक म्यूट करून घरच्या घरी डुलकी काढणे सहज शक्य आहे..

पण वर्गात बसून पुस्तकात डोके घालून घेतलेल्या वामकुक्षीचा आनंद त्यात कधी असेल का ?

झूम मीटिंग,गूगल हॅन्गआउट किव्वा अगदी स्काईप वर लॉगिन करून शाळेची सुरुवात तर दिमाखात होईल..

पण 'एक साथ नमस्ते' किव्वा 'भारत माझा देश आहे..सारे भरतीय माझे बांधव आहेत' याने सुरु होणाऱ्या मराठीच्या तासाची ऐट काही न्यारीच..

सकाळची शाळा असूनही आवरायला लवकर उठायची गरज भासणार नाही कदाचित..

पण रिक्षा वाल्या काकांची हाक आणि शाळेत जाईपर्यंतचा रिक्षातील 'कल्ला' हरवून गेलाच कि..

ऑनलाईन शिकवताना चित्र,प्रेझेंटेशन्स आणि ऑडिओ नक्कीच उत्कृष्ट दर्जाचे असतील..

पण फळ्यावर लिहिलेला सुविचार वाचणे किव्वा बाईंनी काढलेला प्राणी घोडा कि गाढव हे ओळखताना होणारी कसरत तेवढी पुन्हा होणार नाही..

पँडेमिकच्या लाटेत श्रावण तर सहज सारून जाईल..पाठोपाठ गणपती,दसरा आणि दिवाळी देखील वाहून जातील..

पण शाळेतली दही हंडी..गणपतीची आरती,सहामाही परीक्षा आणि बऱ्याच गोष्टींचा उल्लेखही आता होणार नाही ..

ऑफलाईन होऊन किव्वा विंडो मिनिमाइझ करून शाळा सुटेल रोजच..

पण घंटा ऐकताच गर्दी करून वर्गातून पळण्याची हौस त्यातून भागणार नाही हे नक्की..

घरूनच शाळा असल्याने डबा,गणवेश आणि दप्तराच्या ओझ्यातून मुलं बाहेर येतील..

पण खाऊचा डबा, शाळेचा धुतलेला गणवेश आणि तासाप्रमाणे लावलेले दप्तर यातली मजा हिरावली जाईल..

ऑनलाईन शिक्षण हि काळाची गरज असेलही कदाचित...त्यात मुलांची सुरक्षितताही नक्की असेल..

पण 'शाळा' म्हटल्यावर ज्या गोष्टी आपण अनुभवल्या त्या आनंदाला हि चिमुरडी मुकणार याची सल जास्त बोचणार..

#lockdownreturns

हृषिकेश पांडकर

१२/०७/२०२०