Leopard

 वदनी कवळ घेता नाम घ्या श्रीहरीचे |

सहज हवन होते नाम घेता फुकाचे |

जीवन करि जीवित्वा अन्न हे पूर्ण ब्रम्ह |

उदरभरण नोहे जाणिजे यज्ञ कर्म ||

 

पावसाने क्षणिक उघडीप घेतल्यामुळे वातावरणात गारवा जाणवू लागला होता.वयात आलेल्या मुलाला मिसरूड फुटावी त्या प्रमाणे रणरणत्या उन्हाळ्यात शुष्क आणि पर्णहीन झाल्यानंतर ४-५ पावसात न्हाऊन निघालेल्या मध्य भारतातील जंगलाला हिरवी पालवी फुटू लागली होती.

रस्त्याच्या उजव्या बाजूला मोठे हरीण मरून पडलेले स्पष्ट दिसत होते.पोटाचा निम्मा भाग फाडलेला जाणवत होता.अंगावर माश्या घोंगावत होत्या.शिकार असावी याची पक्की खात्री होती पण शिकारी गायब होता.थोडा वेळ वाट पहावी कोण जाणे शिकारी न्याहरीला येईल आणि दर्शन देईल; असा अंदाज लावून गाडी थांबवली.अर्ध्या तासाच्या प्रतीक्षेनंतर लांबून चालत येणार शिकारी नजरेस पडला आणि धरलेल्या धीराचे सार्थक झाले.क्षणाचाही विलंब न लावता त्याने आपले भक्ष्य ओढत नेण्यास सुरुवात केली.पानात वाढलेले अन्न खाण्यापूर्वी भरलेली थाळी पाहून एक सात्विक समाधान मिळते तीच हि समाधानी मुद्रा.

दुसऱ्याच्या पानात डोकावून पाहू नये असे म्हणतात खरे.पण अन्नसाखळीत सर्वात वर स्थित असलेल्या मोजक्या प्राण्यांपैकी एक अशा या चुणचुणीत बिबट्याला अशा मुद्रेत पाहण्याचा आनंद आणि अनुभव कायमच विलक्षण होता.

Hunting is not a sport. In a sport, both sides should know they're in the game.

Leopard | Pench Tiger Reserve | June 2017