वाघाच्या ओढीपायी बाकीचे वन्यजीव नजरेच्या ओंजळीतून काहीसे निसटत का ? याचे उत्तर व्यक्तिनुरूप बदलू शकते आणि बदलतेच. वाघ पाहण्याची तीव्र इच्छाशक्ती असणे यात वावगे काहीच नाही.पण फक्त वाघ पाहण्यासाठी जंगल फिरणे आणि तो न दिसल्यास निराश होणे या सारखा दुर्दैव अट्टाहास नाही.
पोटभरून वाघ पाहिल्यावर अशी वक्तव्य करणे सोपे आहे याची कल्पना मलाही तितकीच आहे परंतु 'टायगर रिझर्व' असे नाव धारण केलेले जंगल हे फक्त त्या पिवळ्या पट्टेरी जीवामुळेच नाही तर इतर असंख्य वन्यजीवांनी समृद्ध झालेले आहे हे पदोपदी पटते आणि हीच होत असलेली जाणीव निसर्गाची ओढ आणि अप्रूप वाढवत राहते.
पक्षांच्या अन्नसाखळीत वाघाप्रमाणेच अढळस्थानी असलेला हा पक्षी.जंगलातील पहाटेची लगबग सूर्याच्या चढत्या कमानीसोबत विसावत जाते.त्यात विदर्भातील दुपार म्हंटल्यावर आनंदच कारण मुळात उन्हाळ्यातील तिथली सकाळ तशी नावालाच.सकाळचे सोपस्कार पार पडल्यावर उन्हापासून आसरा शोधात प्राणी आणि पक्षी थंड आडोश्यात नाहीसे होत असतात आणि साधारण याच वेळेत हे शिकारी पक्षी अन्नाच्या शोधार्थ फिरताना पहावयास मिळतात.
अशाच एका उंच आणि गर्द झाडाच्या खालच्या बुंध्यावर उन्हात बसलेले हा Crested Serpent Eagle अर्थात 'तुरेवाला सर्पगरुड'.उन्हाची तिरीप अंगावर झेलत भक्ष शोधार्थ मग्न असलेली हि त्याची मुद्रा. उंच आकाशात असताना आकाराचा अंदाज तितकासा येत नाही मात्र जवळून पाहताना रूपाची भव्यता आणि देखणेपणा शिकारी पक्षी कसा असावा याची ओळख पटवून देत राहतो.
भक्ष्याचा वेध घेण्यासाठी असलेली तीक्ष्ण नजर.सापडलेले भक्ष चपळाईने टिपण्यासाठी असलेले मजबूत आणि अणकुचीदार पंजे आणि सोयीस्कर उदरभरण करण्यासाठी असलेली बाकदार चोच डोळ्याचे पारणे फेडत राहते.
या आणि अशा अनंत जीवांनी श्रीमंत असलेले जंगल आणि पर्यायाने निसर्ग अनुभवायची संधी कधीच सोडू नका कारण जंगलचा राजा जितका सुंदर आणि मंत्रमुग्ध करणारा आहे तितकीच त्याची प्रजा देखील विलोभनीय आणि नेत्रदीपक आहे याचा प्रत्यय आल्याशिवाय जंगलाचा निरोप घेता येणे केवळ अशक्य.
हृषिकेश पांडकर
१५.०५.२०१९
The landed eagle !!!
Crested Serpent Eagle | TATR | May 2019
