ट्रमलबाक

 एखाद्या उंच कड्यावरून स्वतःला झोकून देत शेजारच्या थेंबाशी स्पर्धा करत बेफान होऊन पुढल्या अडथळ्याला भिडत सरतेशेवटी समांतर जलप्रवाहात विलीन होणारे अनेक धबधबे पाहण्याचा योग्य आला होता.धबधबा म्हणलं कि स्वछंद आणि मोकळे उधळलेले फेसाळ पाणी जे कपारीतून वाट काढत विस्तीर्ण जलाशयात विलीन होते.या प्रवासात मोकळ्या वाऱ्याशी स्पर्धा हि असतेच पण इथल्या या धबधब्याची गोष्ट निराळी आहे.

 

हिमाच्छादित पर्वत राजीच्या मांदियाळीत वसलेला स्वित्झर्लंडचा हा प्रदेश.अनेक ग्लेशीयरनी सजलेला आल्प्स पर्वत.या ग्लेशीयरच्या वितळलेल्या पाण्याची नैसर्गिक विल्हेवाट लावणारी पर्वताच्या अंतर्गत भागातली जादुई घळई म्हणजेच 'ट्रमलबाक' धबधबा.

शब्दांच्या गुंतागुंतीत हा भौगोलिक चमत्कार समजणे अपेक्षितच नाहीये म्हणून विस्तृत लिहितो.

स्वित्झर्लंड देशाच्या राजधानी जवळ वसलेल्या लॉटरब्रूनन नावाच्या व्हॅली मध्ये हा भौगोलिक चमत्कार दडलेला आहे.मुळातच ज्या व्हॅलीचे वर्णन ७२ धबधब्यांची व्हॅली असे केले जाते तिथल्या निसर्गाचे वर्णन करायला शब्द तोकडे पडले नाहीत तरच नवल. या लॉटरब्रूनन व्हॅली मध्ये असलेल्या ग्लेशीयरचे वितळलेले पाणी माथ्यावरून पायथ्याला आणणारा हा डोंगरामधील वेगवान प्रवाह म्हणजेच 'ट्रमलबाक' धबधबा.

सेकंदाला वीस हजार लिटर इतक्या वेगात वाहणारे आणि त्या चिरलेल्या कातळातून मार्ग बनवून मार्गक्रमण करणारे पाणी.आणि हे पाहण्यासाठी तोच उभा कातळ आतून पोखरून बांधलेल्या लिफ्टने वर जाऊन पाहण्याची केलेली सोय हे म्हणजे निसर्गाच्या किमयेला विज्ञानाच्या सहाय्याने कौतुक करण्याची आणि पाठ थोपण्याची दिलेली संधीच आहे.

अंधारमय कपारीत प्रवेश केल्यावर वेगाने वाहणाऱ्या पाण्याचा कपारीवर होणार आघात आणि आवाज धीरगंभीर पण अवर्णनीय वाटतो.नैसर्गिक असूनही शिस्तबद्ध वाहणारे पाणी पाहताना मजा येते.

या प्रवाहात मुख्यतः Eiger , Mönch आणि Jungfrau या पर्वतराजींवरील बर्फ वितळून जलप्रवाह येतो.हाच धबधबा पाहण्यासाठी पायऱ्यांची देखील व्यवस्था केलेली आहे ज्या दुसऱ्या बाजूने पर्वताच्या गाभ्यात जातात.

बाहेर उभे राहून अंदाजही येऊ न शकणाऱ्या या भौगोलिक चमत्काराची प्रचिती जवळ जाऊन पाहिल्याखेरीज येत नाही.इथे निसर्गाचा वरदहस्त नक्कीच आहे पण हे निसर्गाचे देणं जवळून पाहण्याची केलेली सोय देखील तितकीच वाखाणण्याजोगी आहे.या धबधब्याला भेट देणार असाल तर पायऱ्या आणि लिफ्ट या दोन्ही माध्यमांनी पाहून या.

नैसर्गिक सौन्दर्याचा मानदंड समजल्या जाणाऱ्या स्वित्झर्लंडचे कौतुक कायमच बर्फाच्छादित शिखरे,हिरवळीवर पसरलेली कौलारू घरे,दुतर्फा वाहणारे निर्झर झरे या दर्शनी गोष्टींनी होत राहिले आहे आणि ते रास्तच आहे.मात्र या अभेद्य पर्वतराजीत दडलेला फेसाळ प्रवाह देखील डोळ्याचे पारणे तितक्याच ताकदीने फेडतो यावर शिक्कामोर्तब झाल्याशिवाय इथून पाय निघत नाही.

- हृषिकेश पांडकर

Water is the most perfect traveler because when it travels it becomes the path itself..

Trummelbach Fall | Lauterbrunnen | June '18