अतिशय अर्थपूर्ण लिखाण आणि तितक्याच ताकदीचे वसंतरावांचे गायन या दोन मजबूत आघाड्यांवर उभे असलेले 'बगळ्यांची माळ फुले, अजून अंबरात' हे गीत. या गीतांमुळे साहजिकच बगळ्यांचे सौंदर्य वाढले आणि पाहण्याचा दृष्टिकोन देखील बदलला.त्यामुळे उडणारा पक्षांचा थवा पहिला की हे गीत सहजच आठवते.
पण वर्णन बगळ्याचे आहे म्हणून इतर पक्षांच्या सौंदर्याला मर्यादा असण्याचा प्रश्नच उद्धभवत नाही.किंबहुना बगळ्यापेक्षा हा उडणारा थवा मला जास्त भावला.पक्षाचा आकार,समांतर उडण्याची पद्धत आणि लयीत होणारी पंखांची उघडझाप प्रमाणबद्धता सिद्ध करत होती.
अगदी भल्या पहाटे नाही पण फटफटायला सुरुवात झाल्यानंतर आणि सूर्य दिसायच्या आधीच्या प्रकाशात टिपलेली हि मुद्रा.दिनचर्येचा प्रारंभ करीत निघालेले क्रेन अर्थात क्रौंच पक्षी.क्रेन म्हटल्यावर डोळ्यासमोर येतो तो म्हणजे सारस क्रेन.मात्र हा सारस नाही हा सामान्य क्रौंच आहे.यालाच युरेशियन क्रेन असेही संबोधले जाते.
अन्नशोधार्थ किव्वा स्थलांतरासाठी रवाना झालेल्या या थव्याने माझ्या सफारीची आणि दिवसाची सुरवात चांगली केली.दिवस जसा उलगडत गेला तसा हा पक्षी वेगवेगळ्या रूपात पहायला मिळाला पण उडताना दिसलेला हा थवा जास्त काळ स्मरणात राहील हे नक्की.
हृषिकेश पांडकर
२५.११.२०१९
No one is free, even the birds are chained to the sky.
Common crane | Velavdar , Gujrat | 2019
