काटेरी मुकुटधारी

 

एकाने 'भारतीय क्रिकेट' रथाच्या अश्वाला टाच मारून खऱ्या अर्थी घोडदौड सुरु केली आणि दुसऱ्याने सय्यम,कुशलता आणि चातुर्याने वेग वाढवत अग्रक्रमांक गाठला…

एकाने हिरे वेचून संघ बांधला..दुसऱ्याने बांधलेल्या संघाला तारुण्याचे तोरण बांधून सोने केले…

एक मुळातच खानदानी,राजेशाही आणि गडगंज..दुसरा तसा सामान्य,धडपडून आणि प्रतिकूल परिस्थिती मधून वर आलेला…

साम्य इतकेच कि कारकिर्दीच्या सूर्यास्ताला दोघांकडेही रुबाब तितकाच…

एकाने सगळ्यांना क्रीज सोडून मारले..दुसऱ्याने क्रीज सोडणाऱ्यांना मारले…

एक टाईमिंग आणि पदलालित्याचा जादूगार तर दुसरा मनगटाच्या ताकदीचा धनी..

एक योग्य वेळी बोलून किव्वा कृतीतून लगेच व्यक्त होणारा निर्भीड दुसरा तसा अलिप्त आणि प्रसिध्दी झोतापासून हात राखून...

एकाने २००३ ला स्वप्नासमीप नेले...दुसऱ्याने तेच स्वप्न २०११ ला पूर्णत्वाला नेले..

एकाने 'आरे' ला 'कारे' विचारण्याची सवय लावली..दुसऱ्याने कोणी 'आरे' विचारणारच नाही याचीच खबरदारी घेतली..

'प्लेयर्स तो ऐसेही बनते है' असं म्हणत एकाने दुसऱ्याला बढती दिली..'आखरी सेशन है दादा कप्तानी आप करो' असे म्हणत दुसऱ्याने पहिल्याला मानवंदना दिली…

पहिला कायमच वाघासारखा आक्रमक,खमक्या आणि रुबाबात होता..दुसरा नेहमीच चित्त्या सारखा चपळ धूर्त आणि सय्यमी राहिला…

क्रिकेटवेड्या देशाचे जगाच्या नकाशावर यशस्वी नेतृत्व करणाऱ्या दोनही काटेरी मुकुटधारी सेनापतींना वाढदिवसाच्या मनापासून शुभेच्छा !!!

हृषिकेश पांडकर

०८.०७.२०२०

 

एक चिकन वॉन टॉन सूप वन बाय टू !!!

काल संध्याकाळची गोष्ट, वाण्याच्या दुकानात जाण्याचा योग आला. योग यासाठी म्हणतोय कि सूर्यास्तानंतर उघडे असलेले दुकान पाहणे गेले तीन महिने दुरापास्त झाले होते ते काल पहिले.तर वाण्याच्या दुकानात गेलो होतो मॅगी घ्यायला.नेहमीचा वाणी बंद असल्याने जरा लांब जावे लागले होते.

मॅगी या शब्दाचा उच्चार करताना मास्कचा मुख्य भाग दोनदा जिभेवर आला.वैतागून मास्क खाली केले आणि काका मॅगीचं चारवालं पाकीट द्या असं सांगितलं.शेजारच्या आजोबांच्या चिक्कीचा गूळ आधी चाखून मग वजन करता करता दुकानदार काका म्हणाले, 'नो मॅगी, आता चायनाचा माल ठेवणार नाही'.अजून काय हवय सांगा.मी जरा गोंधळून गेलो. म्हणलं छान आहे काका चीनच्या वस्तू ठेवणार नाही हे उत्तम आहे पण मॅगी चीनची नाहीये. नेस्टले कंपनी स्वित्झर्लंडची आहे. काका कपाळावर आठ्यांचं जाळं विणत म्हणाले "अरे बाबा न्यूडल म्हणजे चीनचा पदार्थ. चिनी माल बंद म्हणजे बंद. तुम्ही पण नका घेऊ" माझंच काहीसं चुकलं, किव्वा मीच देशद्रोही असल्याच्या अविर्भावात तिथून काढता पाय घेतला.

लावलेल्या गाडीपर्यंतचे अंतर कापत असताना मॅगी चायनीज कशी या विचारात मी पुरता बुडालो. केवळ माझं नशीब बलवत्तर म्हणून दुकानवाल्या काकांनी साखरेला चिनी म्हणतात म्हणून साखर आणि दालचिनी मध्ये चिनी आहे म्हणून दालचिनी अजूनही बॅन केली नव्हती.

चायनीज कंपनीचे मोबाईल फोन,इलेक्ट्रॉनिक वस्तू,मोबाईल ची ऍप्लिकेशन्स,प्लास्टिकच्या वस्तू इथपर्यंत असलेला बॅन मी एक सामान्य भारतीय नागरिक म्हणून समजू शकत होतो पण किराणा मालाच्या दुकानातील मॅगी बंद हा पेच मात्र मला काही केल्या सुटेना.

त्यात सकाळी कानावर आलेली बातमी अशी कि सर्व हॉटेल्स मधून चायनीज पदार्थांवर बंदी आणावी. स्वस्त आणि चमचमीत मिळते या दोन मुद्द्यांवर संबंध तारुण्यात हातगाडी एवढ्या 'ड्रॅगन','हॉट चायनीज','गोल्डन चायनीज','रेड हॉट' या आणि अशा अनंत टपऱ्यांवर चायनीज च्या नावाखाली वाट्टेल ते खाल्ले.चायनीज भाषेतील शेजवान हा शब्द सोडला तर चीन या देशाजवळ जाणारा एकही घटक त्यात नव्हता आणि इथून पुढेही नसेल. बरं तिथे काम करणारे आणि आचारी वर्ग देखील चायनीज वंशाचे असायची सुतराम शक्यता नाही.ही झाली टपऱ्यांची परिस्थिती, मोठ्या हॉटेल्स मध्ये देखील मिळणारे चायनीज आणि मूळ चीन मध्ये मिळणारे चायनीज याचा खरंच काही संबंध असेल असे मला वाटत नाही. तरी देखील आपण हे नावापुरते चायनीज पदार्थ बंद करून खरंच काही साध्य करू शकणार आहोत का ?

कुरापती करणाऱ्या चिन्यांना शह हा दिलाच पाहिजे आणि आपण तो नक्कीच देऊ पण चीन हा देश आणि भारतातील चायनीज पदार्थ या पूर्णतः भिन्न गोष्टी आहेत हे मुळात जाणून घेऊयात.उगीचच जिनपिंग ,यूहान ,कोविड-१९,गलवान व्हॅली या शब्दांच्या ओझ्याखाली बिचाऱ्या गोबी मंचुरियन आणि ट्रिपल शेझवान यांची गळचेपी का करावी नाही का 

हृषिकेश पांडकर

१९.०६.२०२०

 

मदर्स डे

 

सुमारे २ महिन्याच्या लॉकडाऊनचा दांडगा अनुभव पाठीशी..त्यात आज रविवार..मोबाईल, इंटरनेट यांचा वापरून किस पडलेला..सगळंच बंद असल्यामुळे सकाळचा नाष्टा आणि दुपारचे जेवण यांच्यातील वेळेची असलेली अभेद्य दरी..अंघोळीची घाई नाही..पेपर येतच नसल्याने वाचायचे बंधन नाही...आणि त्यात आज 'मदर्स डे'...

शुभेच्छांचा क्रम लक्षात घ्या बरका..ते महत्वाचं आहे..

व्हाट्सएप ग्रुप वर फोटो सहित शुभेच्छा..एक फोटो जन्मदात्री सोबत..मग जोडीदाराची आई..स्वतःचे मूल असेल तर अजून एका फोटोची भर..मग येणार एखादं वाक्य..उदा. आ म्हणजे आत्मा ई म्हणजे ईश्वर आणि तत्सम...ज्याचा फोटो जितका जुना तितक्या शुभेच्छा घट्ट...आपला लहानपणीचा आईसोबत फोटो असेल तर मग हुकमाचा एक्का.. (सासूबाईंसोबत लहानपणीचा फोटो असायची शक्यता तशी कमीच )

व्हाट्सएपच्या स्टेटस सेक्शन मध्ये एकदा गेलो की मग पहिले आपल्याला कळणार वाह काय गोड दिसायची आपली मैत्रीण लहानपणी..( फोटो भले मरणाचा ब्लर असला तरीही )..कधी-कधी फोटो लग्नातील असायची दाट शक्यता कारण धोधो वाहणाऱ्या कळशी सारखा मेकअप..माय लेकींचा...पुढे येणार सासूबाई ..अच्छा यांच्या घरी दिली होय हिला..बर बर..मग पुढे आपली मैत्रीण येणार दोन विहिणींच्या मध्यात..माय टू पिलर्स वगरे...मग समजा अपत्य असेल तर मग गगनच ठेंगणे..लिटिल मंचकीन..माय वर्ल्ड या नावाखाली फोटोंचा ढीग..हे सगळं झालं की मग आपला ड्रेस चेहेरा पोज आणि हास्य ज्यात चांगले तो ग्रुप फोटो.. 'टू ऑल लव्हली मदर्स'...इथे संपतो एक अध्याय..आणि मग पुढच्या व्यक्तीचे स्टेटस...

आत्ता साधारण सकाळचे अकरा होतायत..सुदैवाने अजूनतरी 'मदर्स डे चायलेंज' अजून सोशल मीडियाच्या क्षितिजावर यायचंय..( किव्वा मला माहित नाहीये )

एकूणच काय..हे सगळं करण्यात गैर अस काहीच नाही..मात्र दुर्दैवाने

माझे स्वतःचे फोटो सुमार येत असल्याने भोवताल पहाण्याखेरीज माझ्याकडे दुसरा पर्याय उरत नाही..मग यातूनच मनोरंजन करून घ्यायचे..आपल्याला तरी कधी कळणार इतरांची वंशावळ....नाही का ..

'सो आम्ही' तिन्ही जगांचे आई विना भिकारी...हेच खरंय

मातृदिनाच्या मनापासून शुभेच्छा

-हृषिकेश पांडकर

१०-०५-२०२०